Events

General Election Schedule 2026 for the Azad Jammu & Kashmir Legislative Assembly

آزادکشمیر کے عام انتخابات کا شیڈول جاری پولنگ 27 جولائی 2026 کو ہوگی.چیف الیکشن کمشنر جسٹس ریٹائرڈ غلام مصطفی مغل نے ممبر الیکشن کمیشن سید نظیر الحسن گیلانی اور سیکرٹری الیکشن کمیشن راجہ محمد شکیل خان کے ہمراہ انتخابات کا شیڈول جاری کر دیا

اسلام آباد 9 مئی 2026 آزاد جموں و کشمیر کے چیف الیکشن کمشنر جسٹس (ر) غلام مصطفیٰ مغل کی زیر صدارت اعلیٰ سطح کا اجلاس جموں و کشمیر ہاؤس اسلام آباد میں منعقد ہوا۔ اجلاس میں ممبر الیکشن کمیشن سید نظیر الحسن گیلانی ، سینئر ممبر بورڈ آف ریونیو سردار محمد ظفر خان، سیکرٹری الیکشن کمیشن راجہ شکیل خان،کمشنر میرپور راجہ طاہر ممتاز ،کمشنر پونچھ سردار وحید خان اور ڈپٹی کمشنرز اور اسسٹنٹ کمشنرز نے شرکت کی۔ اجلاس میں انتخابی امور سے متعلق انتظامات، انتخابی فہرستوں میں پائی جانے والی غلطیوں کی درستگی کے حوالے سے ڈپٹی کمشنرز کی کمیٹی کے چیئرمین ڈپٹی کمشنر باغ نے چیف الیکشن کمشنر کو بریفنگ دی ۔اجلاس کو بتایا گیا کہ انتخابی فہرستوں میں درستگی کا 90 فیصد کام مکمل کر لیا گیا ہے انشاءاللہ جلد باقی 10 فیصد کام بھی مکمل کر لیا جائے گا ۔ چیف الیکشن کمشنر جسٹس (ر) غلام مصطفی مغل نے اجلاس سے خطاب کرتے ہوے کہا کہ منصفانہ ،غیر جانبدارانہ اور ،شفاف انتخابات کو یقینی بنانے کیلیے شفاف انتخابی فہرستوں کا بننا ضروری ہوتا ہے اور الحمد للہ ہم نے یہ بڑی حد تک مکمل کر لیا ہے جس پر انتظامیہ کو مبارکباد اور شاباش دیتا ہوں ۔ انہوں نے کہا کہ میرا ایمان اور تجرب یہ ہے کہ جب کوئی مشکل آتی ہے تو اللہ پاک اسے دور کرنے کے اسباب بھی پیدا فرما دیتا ہے ۔سینیر ممبر بورڈ آف ریونیو نے ہمیں کہا کہ آپ جو کہیں گے ہم ویسا ہی کریں گے ،مستقبل میں خرابیوں کو روکنے کیلیے ایک رپورٹ ضرور آنی چاہیے ۔اس سے ذمہ دار کا تعین ہو جاتا ہے انسان کے ہاتھ میں سب کچھ نہیں ہوتا ۔میرے اپنے نکتہ نگاہ سے انتخابی فہرستوں کا کام پورے سال کا کام ہے جو ہر سال ہونا چاہیے ۔آئندہ انشاءاللہ ایس ایم بی آر کے تعاون سے اسے یقینی بنایا جائے گا ۔2016 میں بھی شفاف فہرستوں کی تیاری میں انتظامیہ نے بڑی عرق ریزی کی تھی ،آئندہ ایک دو دن میں اسے فائنل کریں لوگوں کی چیخ وپکار بھی ٹھیک تھی مگر جو طریقہ اختیار کیا گیا وہ ٹھیک نہیں تھا ۔میرے علم میں آیا ہے لوگوں نے اپنی لیبز بنا رکھی ہے وہاں شناختی کارڈ بنا کر انتظامیہ پر دباؤ ڈالتے ہیں کہ اسے درج کیا جائے۔میرا اپنا خیال ہے کہ جو ووٹ نیا ہے اسے شامل کر لیں کسی نئے بکھیرے میں نہ پڑیں کمیٹی کو اختیار ہے کہ وہ حالات کے مطابق فیصلہ کر لیں ۔ہم مئی کے وسط میں الیکشن شیڈول کا اعلان کر دیں گے۔ممبر الیکشن کمیشن سید نظیر الحسن گیلانی نے کہا کہ انتظامیہ کا شکریہ کہ اس نے انتخابی عمل میں معاونت فراہم کی ۔ہم نے ایک اجلاس ویڈیو لنک پر کیا جس سے بات واضح نہیں ہو سکی ۔انہوں نے سینیر ممبر بورڈ آف ریونیو کا شکریہ ادا کیا ،انہوں نے کہا کہ ووٹر لسٹوں پر پورے آزادکشمیر میں ایک چیخ و پکار شروع ہو گئی اللہ کے فضل سے ڈپٹی کمشنر باغ کی سربراہی میں ایک کمیٹی بنائی جس نے اچھا کام کیا ،اب مرض پکڑ لیا گیا ہے امید ہے کہ آفیسران نے مشاورت سے جس حکمت عملی سے کام کیا آج اسکی رپورٹ بھی مل گئی ہے آپ کو ضلعی انتظامیہ کے اور بھی کام ہوتے ہیں آپ کے تعاون کے بغیر الیکشن کمیشن آگے نہیں بڑھ سکتا آپ کو خراج تحسین پیش کرتا ہوں مجھے امید ہے کہ آئندہ بھی یہ تعاون جاری رہے گا ۔انتخابی فہرستوں میں جو خرابیاں تھیں 90 فیصد دور ہو چکی ہیں جو دس فیصد رہ گئی ہیں وہ بھی جلد دور ہو جائیں گی ۔لوگوں تک یہ فہرستیں پہنچنے سے پہلے ہم اس پر اطمینان کر لیں گے۔سینئر ممبر بورڈ آف ریونیو سردار محمد ظفر خان نے کہا کہ انتخابات کے انعقاد میں الیکشن کمیشن کی جانب سے ہم پر اعتماد کا اظہار ہمارے لئے باعث عزت ہے ۔انہوں نے کہا کہ حالیہ ایشو ایک اہم ایشو ہے اسکو حل بھی ہم نے ہی کرنا ہے ڈپٹی کمشنر باغ نے مفصل رپورٹ تیار کی امید ہے کہ آئندہ یہ غلطیاں مستقبل میں نہیں ہونگی ۔انہوں نے چیف الیکشن کمشنر کی انتظامیہ اور نادرا کے ساتھ کوآرڈینیشن کی تعریف کی ۔انہوں نے کہا کہ آزادکشمیر میں امن اس ریاست کی بڑی کامیابی ہے انتظامیہ اس سلسلے میں مبارکباد کی مستحق ہے۔کمشنر پونچھ سردار وحید خان نے کہا کہ فہرستوں میں سے اغلاط کی درستگی مشکل مرحلہ تھا ڈی سی باغ سے رابطے میں رہا الحمد للہ ہمارے پاس ایسے آفیسرز موجود ہیں جو اسوقت یہ کام کر سکتے ہیں اول مسئلہ الیکشن کمیشن کو صرف پانچ چھ ماہ ہوتا ہے جس کی وجہ سے بوجھ بڑھتا ہے ۔اللہ کا شکر ہے ڈی سی ،اے سی اور دیگر سٹاف کام کر رہے ہیں انشاءاللہ آئندہ دو تین دنوں میں یہ کام مکمل ہو جائے گا۔ڈپٹی کمشنر باغ نے اجلاس کو بتایا کہ ڈیٹا انٹری میں تفاوت آیا جو سوشل میڈیا پر وائرل ہوا ۔اہم شکایت کئی حلقہ جات میں ووٹروں کی کمی تھے ۔جو مسودے بھیج گئے ان کو تاحال چیک کرنا ضروری تھا اس حوالے سے کئی سیاستدانوں نے بھی الزامات لگائے ،ہم نے 2016 کی فہرستیں بنائیں جسے کسی سیاسی پارٹی نے مسترد نہیں کیا پھر بلدیاتی انتخابات ہوے وہ بھی انہیں فہرستوں پر ہوے ۔اس بار 2026 کے الیکشن میں ہماری بیس لائن 2022 ہی تھی اس میں فوت شدہ افراد کے ووٹ ختم کرنے اور شادی شدہ خواتین کے ووٹ تبدیل کرنے تھے ۔ڈی آر 2026 ایک اہم نکتہ تھا جب پڑتال ہوئی تو ووٹ کم ہوئے نادرا نے کئی ووٹ نکالے پٹوار ،موضع کی ترتیب کے بغیر ووٹر لسٹ کی تیاری تھوڑا مشکل امر تھا ،29 لاکھ 48 ہزار ووٹر تھے 2022 میں ،تقریبا ایک لاکھ سڑسٹھ ہزار ووٹ کم ہوے اتنی کمی ممکن نہیں تھی ،ہم نے تین جہتوں پر کام کیا ،بیس لائن 2022 تھی ،ڈی آر لائن تھی ،پھر جنہوں نے آئی ڈی کارڈ دی پلیس کیا وہ درج نہیں ہو سکا ۔اسی لیے ہر ضلع میں کمی آئی ۔جب بھی پٹواری ڈیٹا بناتا ہے اسے پھر ری چیک کیا جاتا ہے ڈیٹا پروسیسنگ ووٹر لسٹ ایمرج ہوئی ،ڈیٹا انٹری میں کوڈ ہوتا ہے وہ تلاش کرنا ممکن نہیں تھا ۔کئی لاکھ ووٹ موڈیفکیشن میں گیا ، ہم نے نادرا کا دورہ کیا ،دھیرکوٹ سے 9 ہزار فریش انٹری نہیں آئی ،کوٹلی کے منگ چلے گئے نیلم کے پونچھ چلے گئے،فلٹر کی عدم موجودگی کی وجہ سے یہ ہوا ،پھر ہم 2022 کا سییکونس مانگا ،ایپ میں یہ سہولت بھی نہیں تھا کہ جو ووٹ اضافی وقت درج کئے گئے وہ بھی نہیں تھے ،کوٹلی اور پلندری کو نادرا منگوا لیا ،126 پٹواری ہمارے پاس تھے ،سیکونس ابھی تک نہیں ملا ۔اسوقت ہمارے پونچھ ،پلندری ،باغ ،مظفرآباد رپورٹ مکمل ہو چکی ہے ،میرپور ،بھمبر ،نیلم ،حویلی میں کام تھوڑا رہتا ہے وہ بھی جلد مکمل کر لیا جائے گا ۔ہم نے متبادل ورکنگ تیار کی ڈی ای او ہائر کئے ہمارا ڈیٹا انٹری کا نظام ڈیٹا سے فہرست کو ٹیلی کرتے ہیں ،جس کا آئی ڈی ایکسپائر ہوا اسکا ووٹ نئے شناختی کارڈ پر درج نہیں ہو سکا ،2 لاکھ 68 ہزار ووٹ نکالنا انکا کام نہیں تھا ۔ابھی ڈیٹا انٹری سے میچ کرتے ہیں ،ہم۔سسٹم کے اندر کام کو تیز کر رہے ہیں،ابھی تک جو فیلڈ کا کام سو فیصد مکمل ہو جائے گا کراس ڈسٹرکٹ ہو چکی ،ڈیٹا انٹری بھی کر دی ہے ڈی آر سسٹم میں بھی چیکنگ ہو گئی ۔میری تجویز یہی ہے کہ ہم اپنے ڈرافٹ کی پروف ریڈنگ کر لیں۔اجلاس کو بتایا گیا کہ 28 لاکھ 50ہزار ووٹرز تھے جن میں سے ایک لاکھ افراد فوت ہوئے جبکہ پانچ لاکھ نئے درج ہوے کو نئے درج ہوے ان میں سے ایک لاکھ سڑسٹھ ہزار ڈیٹا میں نہیں آ سکے اور یہی سے پرابلم شروع ہوئی ۔اجلاس کے دوران کمشنرز ،ڈپٹی کمشنرز اور اسسٹنٹ کمشنرز نے اپنی اپنی تجاویز بھی دیں

مظفرآباد یکم مئی 2026 چیف الیکشن کمشنر آزاد جموں کشمیرجسٹس (ر) غلام مصطفی مغل کی زیر صدارت ضلعی انتظامیہ مظفرآباد ڈویژن کا ایک اہم اجلا س جمعہ کے روز منعقد ہوا۔ اجلاس میں ممبر الیکشن کمیشن سید نظیر الحسن گیلانی،سیکرٹری الیکشن کمیشن راجہ محمد شکیل خان،ڈپٹی کمشنرمظفرآباد منیر قریشی، ڈپٹی کمشنر جہلم ویلی، اسسٹنٹ کمشنر ز مظفرآباد،ہٹیاں بالا اور الیکشن کمیشن کے آفیسران نے شرکت کی۔اجلاس میں ابتدائی انتخابی فہرستوں (Preliminary Electoral) کی اشاعت کے بعدسامنے آنے والے امور اور ممکنہ خامیوں کے حوالہ سے سیکرٹری الیکشن کمیشن نے اجلاس کو بریفنگ دی۔ چیف الیکشن کمشنر جسٹس (ر) غلام مصطفی مغل نے ہدایت جاری کی کہ انتخابی فہرستوں میں رہ جانے والی کمیوں اور غلطیوں کو فوری طور پر یکسو کیا جائے تاکہ اہل ووٹرز کا نام درست انتخابی فہرست میں شامل ہو سکے۔ ممبر الیکشن کمیشن نے بھی انتخابی فہرستوں کی درستی،شفافیت اور بروقت نقائص کے ازالہ کی کی ضرورت پر زور دیا۔اجلاس کے دوران ڈپٹی کمشنر ز اور دیگر تحصیل آفیسران نے انتخابی فہرستوں کی بہتری اور عوامی سہولت کے حوالہ سے مفید اور قابل قدر تجاویز پیش کیں۔ اجلاس میں اس بات پر زور دیا گیا کہ عوام کو نظرثانی کے عمل اور اعتراضات کے حوالہ سے مکمل آگاہی فراہم کی جائے تاکہ شہری مقررہ مدت کے اندر اپنی معلومات کی درستی یقینی بنا سکیں۔ چیف الیکشن کمشنر نے الیکشن کمیشن کے آفیسران اور ضلعی انتظامیہ کو ہدایت کی کہ انتخابی عمل کی شفافیت غیر جانبداری اور عوامی سہولت کو ہر صورت مقدم رکھا جائے اور اس سلسلہ میں تمام دستیاب وسائل کو بروئے کار لایا جائے۔یہ بات (ترجمان) آزاد جموں وکشمیر الیکشن کمیشن نے ایک پریس ریلیز میں بتائ

مظفرآباد (پی آئی ڈی) 3 مئی 2026 آزادجموں وکشمیر الیکشن کمیشن کی جانب سے جاری کردہ پریس ریلیز کے مطابق آزاد جموں و کشمیر الیکشن کمیشن نے ابتدائی انتخابی فہرستوں میں ووٹرز کے اندراج، اخراج اور درستگی کے عمل کو مزید مؤثر ، شفاف اور عوام دوست بنانے کے لئے ایک خصوصی کمیٹی تشکیل دے دی ہے. ڈپٹی کمشنر باغ عاصم اعوان کمیٹی کے چیرمین ہونگے جبکہ راجہ وسیم خان سکریسی آفیسر الیکشن کمیشن سیکرٹری کمیٹی کے فرائض سر انجام دیں گے۔ کمیٹی کے دیگر اراکین میں راجہ راشد محمود الیکشن کمشنر، ڈاکٹر محمد راشد اسسٹنٹ کمشنر حویلی، راجہ ناصر رشید اسسٹنٹ الیکشن کمشنر، راجہ مختیار حسین نگر ان بلدیات، سید واجد الحسنین کاظمی پرائیویٹ سیکرٹری، ذیشان خلیل اسسٹنٹ الیکشن کمشنر میرپور، عثمان منیر سانولہ ڈسٹرکٹ الیکشن آفیسر بھمبر اور شوکت عزیز بانڈے ڈسٹرکٹ الیکشن آفیسر حویلی کہوٹہ شامل ہوں گے۔ کمیٹی متعلقہ اضلاع میں چیئر مین کمیٹی کی نگرانی میں کام کرے گی اور عوام کو انتخابی فہرستوں میں موجودہ غلطیوں کی بروقت درستگی کی سہولت فراہم کرے گی ۔ کمیٹی ووٹ کے اندراج، منتقلی اور کوائف کی درستگی کرے گی۔ کمیٹی کا مقصد اس امر کو یقینی بنانا ہے کہ ہر اہل شہری کا ووٹ درست مقام پر درج ہو اور کوئی بھی اہل ووٹر انتخابی فہرست میں اندراج سے محروم نہ رہے۔ آزاد جموں و کشمیر الیکشن کمیشن نے عوام الناس سے اپیل کی ہے کہ وہ ابتدائی انتخابی فہرستوں کا بغور جائزہ لیں اور اگر کسی قسم کی غلطی ، کمی یا اعتراض موجود ہو تو مقررہ مدت کے اندر متعلقہ حکام سے رابطہ کر کے اپنی درستگی یقینی بنائیں۔ پریس ریلیز کے مطابق چیئرمین کمیٹی ضرورت کے مطابق اراکین کو مختلف اضلاع میں ذمہ داریاں تفویض کریں گی

آزاد جموں و کشمیر میں کمپیوٹرائزڈ الیکٹورل رول سسٹم کی تنصیب کے لیے بزنس ریکوائرڈ ڈاکو منٹس کے مسودہ کی حتمی منظوری دے دی گئی۔ مسودہ کی منظوری آج یہاں منعقد ہونے والے ایک اجلاس میں دی گئی جس کی صدارت ممبر الیکشن کمیشن سید نظیر الحسن گیلانی نے کی۔ اجلاس میں الیکشن کمیشن کی نمائندگی سیکرٹری الیکشن کمیشن راجہ محمد شکیل خان ، ناظم تعلقات عامہ راجہ امجد حسین منہاس، انفارمیشن ٹیکنالوجی بورڈ کی نمائندگی نائب ناظم انفار میشن ٹیکنالوجی بورڈ ندیم تاج اور نادرا کی نمائندگی ڈائریکٹر پروجیکٹس نادرا محمد زاہدنے کی جبکہ اس موقعہ پر ہر تین اداروں کے متعلقہ اعلیٰ حکام بھی موجود تھے۔ اجلاس میں گزشتہ ماہ نادرا ہیڈ کوارٹر اسلام آباد میں ہر تین اداروں کے درمیان دستخط ہونے والے تاریخی معاہدے کی روشنی میں آزاد جموں و کشمیر الیکشن کمیشن کے لئے کمپیوٹرائزڈ الیکٹورل رول سسٹم کی تیاری اور کمیشن کے دس ضلعی اور چار دیگر دفاتر میں اس کی تنصیب، سسٹم میں استعمال ہونے والے سافٹ ویئر اور ہارڈ ویئر سے متعلق تفصیلات ، سسٹم کو چلانے کے لئے آزاد جموں و کشمیر الیکشن کمیشن کے متعلقہ عملہ کی استعداد کار بڑھانے او رنادرا کی جانب سے اس سسٹم کو مکمل طور پر فعال رکھنے کے لیے کمیشن کی ہر طرح کی تکنیکی اور فنی معاونت سے متعلقہ مختلف امور کا تفصیلی جائزہ لیا گیا اور یہ فیصلہ کیا گیا کہ منصوبہ کے تمام مراحل کو بہر صورت معاہدہ کے تحت مقررہ مدت کے اندر مکمل کیا جائے گا۔ آزاد جموں و کشمیر الیکشن کمیشن کے مرکزی اور ضلعی دفاتر میں اس سسٹم کے فعال ہو جانے کے بعد انتخابی فہرستوں کی تیاری اور ان میں ووٹس کے اندراج، اخراج ، تبدیلی اور درستگی وغیرہ سے متعلق جملہ امور اور حلقہ بندیوں کی تشکیل اور تحدید سے متعلق جملہ معاملات جدید ترین ٹیکنالوجی کی مدد سے انجام پذیر ہو نا شروع ہو جائیں گی۔ اس موقع پر ممبر الیکشن کمیشن نے اپنے اس عزم کا اظہار بھی کیا کہ آزاد جموں و کشمیر میں آمدہ عام انتخابات سے قبل انتخابی عمل کی شفافیت اور انتخابات کو ہر لحاظ سے آزادانہ، منصفانہ اور غیر جانبدارانہ بنانے کے لیے وہ تمام سہولیات ترجیحی بنیادوں پر حاصل کی جائیں گی جو جدید ترین انفارمیشن ٹیکنالوجی نے فراہم کر رکھی ہیں ۔ اجلاس میں مہاجرین مقیم پاکستان کے لیے مختص بارہ انتخابی حلقوں میں انتخابی عمل کی شفافیت کے لیے بھی مختلف تجاویز کا تفصیلی جائزہ لیا گیا اور یہ فیصلہ کیا گیا کہ اس ضمن میں تمام سیاسی جماعتوں کی مشاورت اور اتفاق سے ایسا لائحہ عمل تیار کیا جائے گا جس سے آئندہ انتخابات کی شفافیت سے متعلق پائی جانے والی شکایات کا ہمیشہ کے لیے تدارک ہو سکے۔ اس موقع پر ممبر الیکشن کمیشن ن پراجیکٹ ڈائر یکٹرنادرا اور کو کمیشن کی جانب سے سونیئر بھی دیا جبکہ سیکرٹری انفارمیشن ٹیکنالوجی کو کا سوہنئر محمد ندیم تاج نے وصول کیا۔

ممبر الیکشن کمیشن آذاد جموں و کشمیر سید نظیر الحسن گیلانی نادرا ہیڈ کوارٹر اسلام آباد میں چیٸر مین نادرا لیفٹیننٹ جنرل محمد منیر افسر سے ملاقات کر رہے ہیں۔

نادرا آزاد جموںو کشمیر میں انتخابی عمل کو شفاف بنانے کے لئے آزاد جمو ں وکشمیر الیکشن کمیشن سے بھر پور تعاون کرے گا۔اس بات کی یقین دہانی آج یہاں چیئرمین نادرالیفٹیننٹ جنرل محمد منیر افسرنے ممبر الیکشن کمیشن آزاد جموں وکشمیر سید نظیر الحسن گیلانی کیساتھ اپنی ایک ملاقات میں کروائی ۔ممبر الیکشن کمیشن نے چیئرمین نادرا سے انتخابی عمل کی شفافیت کے لئے مہاجرین مقیم پاکستان کے قومی شناختی کارڈز میں ان کی کشمیر ی شناخت کے اندراج ،انتخابی فہرستوں کی طباعت کے معاوضوں میں کمی ،دونوں اداروں کے درمیان ایک مشترکہ ورکنگ گروپ کے قیام اور آزاد جموں وکشمیر الیکشن کمیشن کے ریکارڈ کے تحفظ اور کمیشن کی جانب سے پولنگ اسکیمز کے اجرا ء میں جدید انفارمیشن ٹیکنالوجی کے استعمال کے لئے نادرا کی معاونت اور اس ضمن میں کمیشن کے متعلقہ عملہ کی ضروری تربیت وغیرہ سے متعلقہ مختلف تجاویز پر تفصیلی تبادلہ خیال کیا ۔چیئرمین نادرا نے آزاد جموں وکشمیر میں آزادانہ ،منصفانہ اور غیر جانبدارانہ انتخابات کے انعقاد کے لئے الیکشن کمیشن کے عز م کو سراہتے ہوئے اس ضمن میں اپنے ادارے کے بھر پور تعاون کا یقین دلایا۔ملاقات میں سیکرٹری الیکشن کمیشن راجہ محمد شکیل خان اور سیکرٹری انفارمیشن ٹیکنالوجی راشد حنیف کے علاوہ نادرا کے اعلیٰ حکام بھی موجود تھے ۔اس موقع پر چیئرمین نادرا نے ممبر الیکشن کمیشن ، سیکرٹری الیکشن کمیشن اور سیکرٹری انفارمیشن ٹیکنالوجی کو اپنے ادارہ کی جانب سے سونیئر بھی پیش کئے جبکہ ممبر الیکشن کمیشن نے الیکشن کمیشن آزاد جموںوکشمیر کی جانب سے چیئرمین نادرا اور چیف پراجیکٹ آفیسرنادرا کو اپنے ادارہ کی جانب سے سونیئر پیش کئے ۔

آزاد کشمیر الیکشن کمیشن، آزاد کشمیر آئی ٹی بورڈ اور نادرا کے درمیان سہ فریقی معائدہ پر دستخط

آزاد جموں و کشمیر میں انتخابی عمل کی شفافیت کو یقینی بنانے کے لئے جدید ٹیکنالوجی کا استعمال عمل میں لایا جائے گا۔ اس مقصد کے لئے آزاد جموں و کشمیر الیکشن کمیشن اور آزاد کشمیر آئی ٹی بورڈ نے نادرا کے ساتھ ایک تاریخی معائدہ پر دستخط کر دیے ہیں۔ معاہدہ پر دستخطوں کی یہ تقریب نادرا ہیڈ کوارٹرز اسلام آباد میں منعقد ہوئی۔ معاہدہ پر آزاد جموں و کشمیر الیکشن کمیشن کی جانب سے راجہ محمد شکیل خان سیکرٹری الیکشن کمیشن، حکومت آزاد جموں و کشمیر کی جانب سے راشد حنیف سیکرٹری انفارمیشن ٹیکنالوجی اور نادرا کی جانب سے رحمان قمر چیف پراجیکٹ آفیسر نادرا نے دستخط کیے۔ اس موقع پر ممبر الیکشن کمیشن آزاد جموں و کشمیر سید نظیر الحسن گیلانی اور چیئرمین نادرا لیفٹیننٹ جنرل محمد منیر افسر بھی موجود تھے۔ معاہدے کے تحت آزاد کشمیر آئی ٹی بورڈ کی تکنیکی معاونت کے ساتھ نادرا آزاد جموں و کشمیر الیکشن کمیشن کو کمپیوٹرائزڈ الیکٹورل رول سسٹم تیار کر کے دے گا۔ اس کے علاوہ الیکشن کمیشن کے 10 ضلعی اور 04 دیگر دفاتر میں اس سسٹم کی تنصیب بھی عمل میں لائے گا۔ نادرا الیکشن کمیشن کو اس سسٹم کے لیے استعمال ہونے والا سافٹ ویئر اور ہارڈ ویئر بھی فراہم کرے گا اور اس جدید ٹیکنالوجی کے استعمال کے لیے آزاد جموں و کشمیر الیکشن کمیشن کے مختلف عملے کی استعداد کار بڑھانے کے لئے ان کی ضروری تربیت کے تمام تر انتظامات بھی کرے گا۔

چیف الیکشن کمشنر پاکستان سلطان سکندر راجہ ممبر الیکشن کمیشن آذاد کشمیر سید نظیرالحسن گیلانی کو شیلڈ پیش کر رہے ہیں۔

اسلام آباد ، 20 فروری وفاقی الیکشن اکیڈمی میں آذاد جموں و کشمیر الیکشن کمیشن کے آفیسرز اور عملہ کی تربیت کا بھی اہتمام کیا جاٸیگا۔ اس بات کا فیصلہ آج یہاں آذاد جموں و کشمیر الیکشن کمیشن کے ممبر سید نظیرالحسن گیلانی کی چیف الیکشن کمشنر پاکستان سلطان سکندر راجہ کیساتھ ہونے والی ملاقات میں کیا گیا۔ ملاقات میں پاکستان الیکشن اکیڈیمی میں آذاد کشمیر الیکشن کمیشن کے آفیسران اور عملہ کیلیٸے مختصر دورانیٸے کے تربیتی کورس شروع کرنے کا بھی فیصلہ کیا گیا۔ ممبر الیکشن کمیشن آذاد کشمیر کی تجویز پر آذاد کشمیر الیکشن سے قریبی رابطے اور وقتا فوقتا پیش آنے والے مساٸل کے فوری حل کیلیٸے الیکشن کمیشن پاکستان کے ایک سینیٸر آفیسر کو بطور فوکل پرسن نامزد کرنے اور الیکشن کمیشن پاکستان کےاہم اجلاسوں میں آذاد کشمیر کے چیف الیکشن کمشنر اورممبرز کو بطور مبصر مدعو کرنے کا بھی فیصلہ کیا گیا۔ ممبر الیکشن کمیشن آذاد جموں و کشمیر نے چیف الیکشن کمشنر پاکستان سے آذادکشمیر میں آٸندہ سال منعقد ہونے والے عام انتخابات کو صاف و شفاف بنانے کیلیٸے مہاجرین مقیم پاکستان کی انتخابی فہرستوں کی صرف ریاستی باشندگان پر مشتمل تصدیقی کمیٹیوں کی ہی سفارشات پر کی جانے والی بر وقت تیاری و اپ گریڈیشن، جموں و متأثرین منگلا ڈیم کی کیٹیگریز کے درست تعین اور اس مقصد کیلیٸے رجسٹریشن آفیسرز کے کردار کو ذیادہ مٶثر بنانے اور ہر دو کمیشنز کے باہمی روابط کو بڑہانے کیلیٸے مختلف تجاویز پر تبادلہ خیال کیا۔ ملاقات میں چیف الیکشن کمشنر پاکستان نے آذادکشمیر کے آمدہ انتخابات کو شفاف بنانے کے ضمن میں آذادجموں و کشمیر الیکشن کمیشن کو الیکشن کمیشن پاکستان کی جانب سے اپنے بھر پور تعاون کا یقین دلایا۔

Farewell Message From Secretary Election Commission

With gratitude to the Almighty, I wish to convey that my tenure of responsibilities at the Azad Jammu and Kashmir Election Commission has drawn to a close, and I have duly reported back to my parent department. I am deeply thankful for the opportunity to have served during the General Election of 2021 and the Local Government Elections, contributing to our national cause. I extend my heartfelt appreciation to the honorable Chief Election Commissioner for his unwavering trust and complete support throughout this journey. I am equally grateful to the esteemed members of the Election Commission, particularly Respected Farooq Niaz for his invaluable guidance. This achievement would not have been possible without the relentless efforts of all officers and staff of the Election Commission, as well as the wholehearted cooperation of judicial officers from the District Judiciary, District Administration, and Police Department. I also extend my thanks to the media personnel and journalists for their positive contributions. I am indebted to the kind guidance and encouragement received from all seniors within my department. Your support has been instrumental in my professional growth.

Meeting Between AJ&K Election Commission, AJ&K IT Board, and NADRA, to discuss the implementation of the Centralized Electoral Role System (CERS) in the AJK Election Commission.

On February 26, 2024, a significant meeting took place among key stakeholders, including the AJ&K Election Commission, AJ&K IT Board, and NADRA, to discuss the implementation of the Centralized Electoral Role System (CERS) in the AJK Election Commission. Chaired by the Secretary of AJ&K Election Commission, the meeting featured a presentation by Dr. Khalid Rafique, the Director General of AJK IT Board, who briefed attendees on the "Automation of Election Commission in AJ&K" project. The collaboration with NADRA indicated a strategic move towards leveraging technology for more efficient and transparent electoral processes. The meeting underscored a commitment to modernizing the electoral system in Azad Jammu and Kashmir through the integration of advanced systems and automation.

مظفرآباد(پی آئی ڈی) 27نومبر2022

مظفرآباد، آزادکشمیر میں بلدیاتی انتخابات کیلئے پولنگ شروع۔ چیف الیکشن کمشنر آزادجموں وکشمیر جسٹس ریٹائرڈ عبدالرشید سلہریا اور سینئر ممبر الیکشن کمیشن راجہ محمد فاروق نیاز کا مختلف پولنگ اسٹیشنز کا دورہ۔ چیف الیکشن کمشنر نے پولنگ کے عمل کا معائنہ کیا اور انتظامات کا جائزہ لیا۔ سیکرٹری الیکشن کمیشن محمد غضنفر خان اور الیکشن کمشنر بلدیات راجہ راشد محمود بھی انکے ہمراہ تھے۔ چیف الیکشن کمشنر نے سہیلی سرکار گرلز ہائیر سیکنڈری سکول، جامعہ کشمیر چہلہ اور گرلز ہائی سکول گوجرہ میں قائم پولنگ اسٹیشنز کا دورہ کیا۔ ووٹرز گھروں سے باہر نکلیں ،پرامن رہیں، چیف الیکشن کمشنر کی میڈیا سے گفتگو بلدیاتی انتخابات کیلئے پاک فوج بھی سول انتظامیہ اور پولیس کے ساتھ سیکورٹی کے فرائض انجام دے رہی ہے۔ چیف الیکشن کمشنر عوام کا جوش وخروش دیکھ کر امید ہے ٹرن آوٹ بہت اچھا رہے گا۔ چیف الیکشن کمشنر آزادجموں وکشمیر آج آزادکشمیر کی تاریخ کا اہم دن ہے۔چیف الیکشن کمشنر شہری ضابطہ اخلاق کی پابندی کریں اور پولنگ عملے کے ساتھ تعاون کریں، چیف الیکشن کمشنر

مظفرآباد(پی آئی ڈی) 17نومبر2022

چیف الیکشن کمشنر آزادجموں وکشمیر جسٹس ریٹائرڈ عبدالرشید سلہریا کی زیر صدارت بلدیاتی انتخابات کے دوران امن و امان کی صورتحال اور سیکورٹی انتظامات کا جائزہ لینے کیلئے اعلیٰ سطحی اجلاس منعقد ہوا۔ اجلاس میں سینئر ممبر الیکشن کمیشن راجہ محمد فاروق نیاز،چیف سیکرٹری محمد عثمان چاچڑ نے بذریعہ ویڈیو لنک اور پرنسپل سیکرٹری احسان خالد کیانی، انسپکٹر جنرل پولیس ڈاکٹر امیر احمد شیخ، سیکرٹری سروسز اینڈ جنرل ایڈمنسٹریشن راجہ امجد پرویز علی خان،سینئرایڈیشنل سیکرٹری مالیات راشد حنیف، سینئر ایڈیشنل سیکرٹری قانون راجہ زاہد محمود، سیکرٹری الیکشن کمیشن محمد غضنفر خان، ڈائریکٹر جنرل لوکل گورنمنٹ و دیہی ترقی شبیر احمد عباسی، سپیشل سیکرٹری داخلہ حمید مغل، ڈی آئی جی پولیس عرفا ن مسعود کشفی اور ڈائریکٹر اطلاعات امجد حسین منہاس ودیگر نے شرکت کی۔ اجلاس میں سیکورٹی انتظامات کے حوالہ سے مختلف تجاویز زیر غور لائی گئیں۔ اجلاس میں فیصلہ کیا گیا کہ بلدیاتی انتخابات کے دوران پولنگ اسٹیشنز پر امن و امان کی صورتحال کو برقرار رکھنے کیلئے کوآرڈینیشن اینڈ پیس کمیٹیاں تشکیل دی جائیں گی جن میں سرکاری ملازمین، تمام سیاسی جماعتوں کے نمائندے اور معززین علاقہ شامل ہوں گے۔ اجلاس میں چیف سیکرٹری، پرنسپل سیکرٹری، آئی جی پولیس، سیکرٹری سروسز اور سپیشل سیکرٹری داخلہ کی جانب سے بریفنگ دی اور حکومت کی جانب سے بلدیاتی انتخابات کے دوران سیکورٹی فورسز کی فراہمی سمیت دیگر امور پر مکمل تعاون کی یقین دہانی کروائی۔حکومت کی جانب سے اس بات کی مکمل یقین دہانی کروائی گئی کہ سیکورٹی فرورسز فراہم ہو جائیگی اور انتخابات اپنے مقررہ وقت پر27 نومبرکو ہوں گے۔اس موقع پر طے پایا کہ آئندہ اجلاس میں پولنگ کے دوران سیکورٹی انتظامات کو سیکورٹی فورسز کی میسر تعداد کو دیکھتے ہوئے حتمی شکل دی جائے گی۔ الیکشن کمیشن کی جانب سے حکومت کو کہا گیا کہ 21 نومبر کو ہونے والے اجلاس میں سیکورٹی فورسز و دیگر امور کے حوالہ سے حتمی طور پرآگاہ کیا جائے۔ اجلاس میں چیف الیکشن کمشنر جسٹس ریٹائرڈ عبدالرشید سلہریا نے ہدایت کی کہ 27 نومبر کو بلدیاتی کا ہر ممکن انعقاد یقینی بنایا جائیگا، حکومت سیکورٹی فورسز کی فراہمی کو ہر صورت یقینی بنائے۔

مظفرآباد(پی آئی ڈی)19اکتوبر2022

چیف الیکشن کمشنر آزادجموں وکشمیر جسٹس ریٹائرڈ عبدالرشید سلہریا کی زیر صدارت بلدیاتی انتخابات کے انتظامات کا جائزہ لینے کے حوالہ سے اعلیٰ سطحی اجلاس منعقد ہوا۔ اجلاس میں سینئر رکن الیکشن کمیشن راجہ محمد فاروق نیاز، چیف سیکرٹری محمد عثمان چاچڑ، انسپکٹر جنرل پولیس ڈاکٹر امیر احمد شیخ، سیکرٹری الیکشن کمیشن محمد غضنفر خان، ڈائریکٹرجنرل لوکل گورنمنٹ و دیہی ترقی شبیر عباسی، ڈی آئی جی پولیس راجہ شہریار سکندر، الیکشن کمشنر بلدیات راجہ راشد محمود، ایڈیشنل سیکرٹری داخلہ حمید مغل ودیگر نے شرکت کی۔ اجلاس میں انتخابات کے دوران امن و امان کو یقینی بنانے کے حوالہ سے سیکورٹی فورسز کی مامورگی اور ضابطہ اخلاق پر عملدرآمد سمیت دیگر امور پر تبادلہ خیال کیا گیا۔ سیکرٹری الیکشن کمیشن نے بلدیاتی انتخابات کے لئے پولنگ کے انتظامات اور دیگر امور پر بریفنگ دی۔ چیف سیکرٹری محمد عثمان چاچڑ نے کہاکہ بلدیاتی انتخابات کے دوران امن و امان کو برقرار رکھنے کے حوالہ سے حکومت آزاد کشمیر سیکورٹی فورسز کی فراہمی کیلئے تمام ممکنہ وسائل بروئے کار لائیگی۔سیکرٹری الیکشن کمیشن کی جانب سے کچھ محکمہ جات، اداروں اور سرکاری ملازمین کی جانب سے ضابطہ اخلاق کی خلاف ورزی بارے شکایات کے حوالہ سے بھی اجلاس کو بریف کیا۔ چیف سیکرٹری محمد عثمان چاچڑ نے کہا کہ ضابطہ اخلاق پر سوفیصد عملدرآمد یقینی بنایا جائے گا،جن انتظامی افسران کے خلاف شکایات ہیں ان کے خلاف محکمانہ کارروائی عمل میں لائی جائے گی جبکہ ضابطہ اخلاق پر عملدرآمد کے حوالہ سے تمام محکمہ جات کو ہدایات بھی جاری کر دی گئی ہیں جن سرکاری ملازمین کے خلاف شکایات ہیں ان کے خلاف کارروائی عمل میں لائی جائے گی۔

مظفرآباد( پی آئی ڈی)21 ستمبر2022

آزادجموں وکشمیر الیکشن کمیشن کی جدید ویب سائیٹ لانچ ، چیف الیکشن کمشنر جسٹس ریٹائرڈ عبدالرشید سلہریا نے بٹن دبا کر الیکشن کمیشن کی نئی ویب سائیٹ کا افتتاح کیا۔ اس موقع پروزیراعظم آزادکشمیر کے معاون خصوصی برائے آئی ٹی چوہدری محمد اقبال، سینئر ممبر الیکشن کمیشن راجہ محمد فارو ق نیاز ، ممبر الیکشن کمیشن فرحت علی میر، سیکرٹری الیکشن کمیشن محمد غضنفر خان، ڈائریکٹر جنرل اطلاعات راجہ اظہر اقبال ڈائریکٹر جنرل آئی ٹی بورڈ ڈاکٹر خالد رفیق، الیکشن کمشنرز راجہ راشد محمود، ندیم ایوب، اشفاق عباسی،خواجہ ارشد ،آئی ٹی بورڈ اور الیکشن کمیشن کے افسران بھی موجودتھے۔معاون خصوصی برائے آئی ٹی چوہدری محمداقبال نے اس موقع پر ویب سائیٹ کے حوالہ سے بریفنگ دیتے ہوئے بتایا کہ ویب سائیٹ پر ووٹر کے لیے تمام مطلوبہ معلومات موجود ہیں اس حوالہ سے  تمام فیچرز ویب میں رکھے گئے ہیں۔ انہوں نے کہا کہ  اب زیادہ تر لوگ موبائل سے انٹرنیٹ کا استعمال کرتے ہیں اس لیے ویب سائٹ کو موبائل فرینڈلی بنایا گیا ہے۔ الیکشن کمیشن کی نئی ویب سائٹ ec.ajk.gov.pk آئی ٹی بورڈ کے تعاون سے ری ڈیزائن کی گئی ہے۔ الیکشن کمیشن ویب سائٹ پر مستقبل میں ووٹ رجسٹریشن اور چیک کرنے کی سہولت میسر کرنے کا ارادہ رکھتا ہے۔ الیکشن کمیشن سے جاری ہونے والے روزہ مرہ نوٹیفکیشنز ، جنرل و بلدیاتی حلقہ بندی ، نقشہ جات، فیصلہ جات سمیت دیگر ویب سائٹ پر موجود ہوں گی۔

مظفرآباد(پی آئی ڈی)28جولائی2022

چیف الیکشن کمشنر آزادجموں وکشمیر جسٹس ریٹائرڈ عبدالرشید سلہریاکی زیر صدارت آزادکشمیر کے آمدہ بلدیاتی انتخابات کیلئے ضابطہ اخلاق وضع کرنے کے حوالہ سے الیکشن کمیشن میں رجسٹرڈ سیاسی جماعتوں کا مشاورتی اجلاس منعقد ہوا۔ اجلاس میں الیکشن کمیشن کی جانب سینئر ممبر الیکشن کمیشن راجہ محمد فاروق نیاز،ممبر الیکشن کمیشن فرحت علی میر نے شرکت کی جبکہ قائد حزب اختلاف چوہدری لطیف اکبر، صدر پاکستان مسلم لیگ ن آزادجموں وکشمیر شاہ غلام قادر، وزیر بلدیات خواجہ فاروق احمد،صدر آل جموں وکشمیر مسلم کانفرنس مرزا شفیق جرال، معاون خصوصی برائے اطلاعات چوہدری محمد رفیق نیئر، سیکرٹری جنرل پاکستان پیپلز پارٹی آزادکشمیر فیصل ممتاز راٹھور، سیکرٹری جنرل پاکستان تحریک انصاف آزادکشمیر راجہ منصور خان، ممبر اسمبلی سید بازل علی نقوی،ممبر اسمبلی جمعیت علماء اسلام جموں وکشمیر پیر مظہر سعید،مسلم لیگ ن کے رہنما ڈاکٹر مصطفی بشیر اور سردار فاروق احمد طاہر، جماعت اسلامی کے رہنما شیخ عقیل الرحمان،جموں وکشمیر لبریشن لیگ کے صدر خواجہ منظور قادر،شوکت جاوید میر، مولانا امتیا ز احمد عباسی، مولانا محمود الحسن اشرف سمیت الیکشن کمیشن میں رجسٹرڈ سیاسی جماعتوں کے نمائندگان نے مشاورتی اجلاس میں شرکت کی۔ اجلاس میں سیکرٹری لوکل گورنمنٹ ودیہی ترقی اعجاز احمد خان، الیکشن کمشنر بلدیات راجہ راشد محمود

مظفرآباد (پی آئی ڈی)27جولائی 2022

چیف الیکشن کمشنر آزادجموں وکشمیر جسٹس ریٹائرڈ عبدالرشید سلہریا کی زیر صدارت آزادکشمیرکے آمدہ بلدیاتی انتخابات کے دوران امن و امان کی صورتحال کو برقرار رکھنے اور سیکیورٹی فورسز کی Deploymentکے حوالہ سے اعلیٰ سطحی اجلاس منعقد ہوا۔ اجلاس میں سینئر رکن الیکشن کمیشن راجہ محمد فاروق نیاز، رکن الیکشن کمیشن فرحت علی میر، چیف سیکرٹری محمد عثمان چاچڑ، انسپکٹر جنرل پولیس ڈاکٹر امیر احمد شیخ، سپیشل سیکرٹری داخلہ عبدالحمید مغل، ڈی آئی جی عرفان مسعود کشفی و دیگر نے شرکت کی۔ اجلاس میں بلدیاتی انتخابات کے دوران امن و امان کو برقرار رکھنے اور سیکیورٹی فورسز کی Deploymentبارے مختلف تجاویز زیر غور لائی گئیں۔ اجلاس میں فیصلہ کیا گیا کہ بلدیاتی انتخابات کے دوران سیکیورٹی فورسز کی فراہمی کے لیے حکومت پاکستان کو تحریک کی جائے گی کیونکہ سپریم کورٹ نے ایک ہی دن تینوں ڈویژنز میں پولنگ کروانے کی ہدایات جاری کی ہیں اور آزادکشمیر پولیس اس عمل کے لیے ناکافی ہے۔ اجلاس کو بتایا گیا کہ بلدیاتی انتخابات کے لیے ووٹر فہرستوں کی اپ ڈیشن و نئی حلقہ بندیوں کے بعد پولنگ سٹیشنز کی تعداد 5192ہو گئی ہے۔ گزشتہ عام انتخابات کے دوران بھی امن و امان کی صورتحال کو یقینی بنانے اور انتخابات کے پُرامن اور صاف و شفاف انعقاد کے لیے پاکستان سے 19 ہزار سیکیورٹی فورسز کی Deploymentبارے مختلف تجاویز زیر غور لائی گئیں

مظفرآباد(پی آئی ڈی)4جولائی2022

آزادجموں وکشمیر الیکشن کمیشن نے بلدیاتی انتخابات کے انعقاد کیلئے ریوائزڈ پولنگ سکیم / شیڈول کی منظوری دیدی۔ چیف الیکشن کمشنر جسٹس عبدالرشید سلہریا کی زیر صدارت آزادجموں وکشمیر الیکشن کمیشن کا اجلاس منعقدہوا۔اجلاس میں سینئر رکن الیکشن کمیشن راجہ محمد فاروق نیاز اور رکن الیکشن کمیشن فرحت علی میر نے شرکت کی۔ بوجہ تعطیلات عیدالاضحی و سالانہ تعطیلات جوڈیشل افسران آزادکشمیر میں بلدیاتی انتخابات کے انعقاد کیلئے ریوائزڈ پولنگ سکیم کی منظوری دی گئی۔ ریوائزڈ پولنگ سکیم کے شیڈول کے مطابق 14جولائی سے19جولائی2022تک ریٹرننگ افسران کی جانب سے پولنگ سکیم کی تیاری و موصولہ تجاویز و اعتراضات کی روشنی میںمسودہ پولنگ کی سکیم کی تیاری کی جائیگی اور20جولائی کو ابتدائی پولنگ سکیم کے مسودے کی اشاعت کی جائیگی۔ 20سے23جولائی تک ڈسٹرکٹ ریٹرننگ افسران کے پاس پولنگ سکیم کے خلاف اعتراضات / اپیلز دائر کی جا سکیں گی جبکہ 21جولائی سے 25جولائی تک ان اعتراضات / اپیلوں کی سماعت اور فیصلہ جات کیے جائیں گی۔ 26جولائی سے30تک ڈسٹرکٹ ریٹرننگ افسران کے فیصلہ کے خلاف الیکشن کمیشن کے پاس اپیلیں دائر کی جا سکیں گی اوران کی سماعت اور فیصلہ جات کیے جائیں گے۔ 31جولائی سے02اگست تکڈسٹرکٹ ریٹرننگ افسران الیکشن کیشن کے فیصلہ جات کی روشنی میں حتمی

مظفرآباد (چیف الیکشن کمشنر آفس)25 مئی 2022

آزاد کشمیر میں آئندہ بلدیاتی انتخابات کے انعقاد کے حوالہ سے جناب جسٹس (ر) عبد الرشید سلہریا چیف الیکشن کمشنر آزاد جموں و کشمیر کی جناب محمد عثمان چاچڑ چیف سیکرٹری آزار حکومت ریاست جموں و کشمیر کے ساتھ ملاقات ہوئی۔ ملاقات میں جناب راجہ محمد فاروق نیاز سینئر رکن الیکشن کمیشن، جناب فرحت علی میر رکن الیکشن کمیشن اور سردار محمد غضنفر خان صاحب سیکرٹری الیکشن کمیشن بھی شامل تھے۔ اجلاس میں بلدیاتی انتخابات کے انتظامات کے سلسلہ میں فنڈز کی فراہمی اور دیگر امور زیر بحث لائے گئے۔ اس موقع پر جناب چیف سیکرٹری نے جناب چیف الیکشن کمشنر کو یقین دہانی کروائی کہ بلدیاتی انتخابات کے انعقاد کو آزادانہ، منصفانہ اور غیرجانبدارانہ بنانے کی خاطر حکومت کی سطح سے ہرممکنہ اقدامات بروئے کار لائے جائیں گے۔آزاد کشمیر میں آئندہ بلدیاتی انتخابات کے انعقاد کے حوالہ سے جناب جسٹس (ر) عبد الرشید سلہریا چیف الیکشن کمشنر آزاد جموں و کشمیر کی جناب محمد عثمان چاچڑ چیف سیکرٹری آزار حکومت ریاست جموں و کشمیر کے ساتھ ملاقات ہوئی۔ ملاقات میں جناب راجہ محمد فاروق نیاز سینئر رکن الیکشن کمیشن، جناب فرحت علی میر رکن الیکشن کمیشن اور سردار محمد غضنفر خان صاحب سیکرٹری الیکشن کمیشن بھی شامل تھے۔ اجلاس میں بلدیاتی انتخابات کے انتظامات کے سلسلہ میں فنڈز کی فراہمی اور دیگر امور زیر بحث لائے گئے۔ اس موقع پر جناب

راولپنڈی (پی آئی ڈی) 19 دسمبر 2021

آزادجموں و کشمیر ہائی کورٹ کے چیف جسٹس صداقت حسین راجہ نے کہا ہے کہ عام انتخابات کے آزادانہ،منصفانہ اور شفاف انعقاد کے لیے جوڈیشل افسران نے دیانت داری،جرات اور پروفیشنل انداز میں اپنے بہترین فرائض سرانجام دئیے۔کسی سیاسی جماعت نے انتخابات کے حوالے سے ڈی آر اوز اور آر اوز کی طرف انگلی نہیں اٹھائی جو ہمارے لئے فخر کی بات ہے۔جوڈیشل افسران کی بہترین کارکردگی پر میرا سر فخر سے بلند ہے۔چیف جسٹس ہائی کورٹ صداقت حسین راجہ نے ان خیالات کا اظہار آزادجموں و کشمیر الیکشن کمیشن کی جانب سے عام انتخابات منعقدہ 25 جولائی 2021 کو فرائض انجام دینے والے جوڈیشل افسران کے اعزاز میں جمخانہ راولپنڈی میں تقریب سے بطور مہمان خصوصی خطاب کرتے ہوے کیا۔اس موقع پر چیف الیکشن کمشنر جسٹس (ر) عبدالرشید سلہریا،سینئر ممبر الیکشن کمیشن راجہ فاروق نیاز،ممبر الیکشن کمیشن فرحت علی میر،سیکرٹری الیکشن کمیشن سردار غضنفر خان،الیکشن کمشنر سردار ندیم ایوب،الیکشن کمشنر بلدیات راجہ راشد محمود،ڈائریکٹر اطلاعات مرزا محمد بشیر جرال،ڈپٹی سیکرٹری محمد اشفاق،معاون ناظم اطلاعات خواجہ عمران الحق سمیت جوڈیشل افسران موجود تھے۔اس موقع پر مہمان خصوصی چیف جسٹس ہائی کورٹ جسٹس صداقت حسین راجہ نے انتخابات کے دوران فرائض انجام دینے والے جوڈیشل افسران کو ان کی اعلی کارکردگی پر شیلڈز اور تعریفی اسناد دیں۔اس موقع پر چیف الیکشن کمشنر جسٹس (ر) عبدالرشید سلہریا نے چیف جسٹس ہائی کورٹ صداقت حسین راجہ اور جوڈیشل افسران کا شکریہ ادا کیا اور ان کے تعاون اور کردار کو سراہا۔ ہائی کورٹ کے چیف جسٹس صداقت حسین راجہ نے کہا کہ الیکشن کمیشن کا شکریہ کہ انہوں نے جوڈیشل افسران کی خدمات کو تسلیم کرتے ہوے اس تقریب کا انعقاد کیا۔انہوں نے کہا کہ الیکشن ایک مشکل مرحلہ ہوتا ہے میں آزادانہ،منصفانہ اور شفاف انتخابات کرانے میں معاونت پر جوڈیشل افسران کو مبارکباد پیش کرتا ہوں۔انہوں نے کہا کہ آپ نے جرات،ہمت سے اپنے فرائض انجام دئیے جس پر جوڈیشری کے سربراہ کے طور پر میرا سر فخر سے بلند ہے۔انہوں نے کہا کہ ڈی آر اوز اور آر اوز نے بہترین کام کیا میں اس موقع پر الیکشن کمیشن کو بھی مبارکباد پیش کرتا ہوں۔انہوں نے کہا ہمارے لئے یہ فخر کی بات ہے کہ کسی بھی سیاسی جماعت نے الیکشن کے حوالے سے ڈی آر اوز اور آر اوز کی طرف انگلی نہیں اٹھائی یہ ہمارے لئے ایک اعزاز کی بات ہے۔انہوں نے کہا کہ جوڈیشل افسران انتہائی قابل،دیانت دار اور دلیر ہیں یہ خصوصیات انہیں دیگر شعبوں سے ممتاز کرتی ہیں۔انہوں نے کہا کہ مجھے اپنی ڈسٹرکٹ جوڈیشری پر فخر ہے۔ سینئر ممبر الیکشن کمیشن راجہ فاروق نیاز نے تقریب سے خطاب کرتے ہوے کہا کہ الیکشن کمیشن کے افسران اور جوڈیشل افسران نے عام انتخابات کو آزادانہ،منصفانہ اور شفاف بناے کیلیے بہترین انداز میں کام کیا۔انہوں نے کہا کہ تقریب کا مقصد جوڈیشل افسران کی حوصلہ افزائی ہے۔انہوں نے کہا کہ انتخابات ایک مشکل مرحلہ ہوتا ہے ڈی آر اوز اور آر اوز نے بہترین کام کیا۔انہوں نے کہا کہ ہم آپ کے کام کو سراہتے ہیں اور اسے خراج تحسین پیش کرتے ہیں اس تقریب کا انعقاد اسی مقصد کیلیے کیا گیا ہے۔انہوں نے کہا کہ آپ نے اہم اور حساس ذمہ داری کو احسن انداز میں مکمل کی آپ سب مبارکباد کے مستحق ہیں۔ ڈسٹرکٹ اینڈ سیشن جج راجہ فیصل مجید نے تقریب سے خطاب کرتے ہوے کہا کہ انتخابات کے دوران فرائض انجام دینے والے جوڈیشل افسران کے اعزاز میں تقریب پر چیف جسٹس ہائی کورٹ اور چیف الیکشن کمشنر کے مشکور ہیں۔انہوں نے کہا کہ انتخابات میں جوڈیشل افسران نے بہترین کارکردگی کا مظاہرہ کیا۔انہوں نے کہا کہ ہمیں اس دوران چیف جسٹس عدالت عالیہ اور چیف الیکشن کمشنر کا بھرہور تعاون حاصل رہا جس پر ہم ان کے مشکور ہیں۔شیلڈز اور تعریفی اسناد وصول کرنے والے جوڈیشل افسران میں ڈسٹرکٹ اینڈ سیشن جج (ڈسٹرکٹ ریٹرننگ آفیسر مظفرآباد) منیر احمد فاروقی، ڈسٹرکٹ اینڈ سیشن جج (ڈسٹرک ریٹرننگ آفیسر جہلم ویلی) راجہ راشد نسیم خان، ڈسٹرکٹ اینڈ سیشن جج (ڈسٹرک ریٹرننگ آفیسرنیلم) راجہ اطہر علی خان، ڈسٹرکٹ اینڈ سیشن جج (ڈسٹرک ریٹرننگ آفیسرپونچھ)راجہ امتیاز احمد، ڈسٹرکٹ اینڈ سیشن جج (ڈسٹرک ریٹرننگ آفیسرسدھنوتی) چوہدری محمد فیاض، ڈسٹرکٹ اینڈ سیشن جج (ڈسٹرک ریٹرننگ آفیسرباغ) فاروق احمد، ڈسٹرکٹ اینڈ سیشن جج (ڈسٹرک ریٹرننگ آفیسرحویلی کہوٹہ) لیاقت علی خان، ڈسٹرکٹ اینڈ سیشن جج (ڈسٹرک ریٹرننگ آفیسرمیرپور) راجہ فیصل مجید خان، ڈسٹرکٹ اینڈ سیشن جج (ڈسٹرک ریٹرننگ آفیسرکوٹلی) مشتاق احمد طاہر، ڈسٹرکٹ اینڈ سیشن جج (ڈسٹرک ریٹرننگ آفیسربھمبر) میاں عارف حسین، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔1 میرپور۔1راجہ شمریز خان،سول جج کورٹ نمبر1 (ریٹرننگ آفیسرایل اے۔2میرپور۔2) عبدالغفور، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔3میرپور۔3) جہانگیر احمد، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔4میرپور۔4) محمد فاروق رشید، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔5بھمبر۔1) محمد ادریس بھٹی، سول جج (ریٹرننگ آفیسر ایل اے۔6بھمبر۔2) بابر علی خان، سینئر سول جج(ریٹرننگ آفیسر ایل اے۔ 7بھمبر۔3) سکندر خان، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔8کوٹلی۔1) محمد شکیل خان، سول جج (ریٹرننگ آفیسر ایل اے۔9کوٹلی۔ 2) وسیم حسین، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔10کوٹلی۔3) چوہدری خالد حسین ثاقب، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔11کوٹلی۔ 4) سردار شاہزمان، سول جج (ریٹرننگ آفیسر ایل اے۔ 12کوٹلی۔5) سید مظہر علی کاظمی، سینئر سول جج (ریٹرننگ آفیسر ایل اے۔13کوٹلی۔6) گل شیر احمد، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔14باغ۔1) ارباب اعظم خان، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔15باغ۔2) آفتاب طارق میر، سول جج (ریٹرننگ آفیسر ایل اے۔ 16باغ۔3) عمران وزیر، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔17باغ۔4) راشد افتخار ہاشمی، سول جج (ریٹرننگ آفیسر ایل اے۔18پونچھ و سدھنوتی۔1) محمد صغیر خان، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔19پونچھ و سدھنوتی۔2) محمد شبیر، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔20پونچھ و سدھنوتی۔3)ے محمد شہزاد، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔21پونچھ و سدھنوتی۔4) سید وسیم احمد گیلانی، سول جج (ریٹرننگ آفیسر ایل اے۔ 22پونچھ و سدھنوتی۔5) عثمان حیدر، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔23پونچھ وسدھنوتی۔6) ظفر محمود، سول جج (ریٹرننگ آفیسر ایل اے۔24پونچھ و سدھنوتی۔7) نعیم احمد، سینئر سول جج (ریٹرننگ آفیسر ایل اے۔25نیلم۔1) سہیل اسلم، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔26نیلم۔2) ایاز بشیر، سینئر سول جج (ریٹرننگ آفیسر ایل اے۔ 27مظفرآباد۔1) عاشر احمد، سول جج (ر یٹرننگ آفیسر ایل اے۔ 28مظفرآباد۔2) عقیل احمد، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔29مظفرآباد۔3) محمد سجاد،سول جج (ریٹرننگ آفیسر ایل اے۔ 30مظفرآباد۔ 4) سید برہان حیدر گردیزی، ایڈیشنل ڈسٹرکٹ اینڈ سیشن جج (ریٹرننگ آفیسرایل اے۔31مظفرآباد۔ 5) عبدالوحید مغل، سینئر سول جج (ریٹرننگ آفیسر ایل اے۔ 32مظفرآباد۔6) سید ذوالفقار علی شاہ، سینئر سول جج (ریٹرننگ آفیسر ایل اے۔33مظفرآباد۔7)خرم نذیر عباسی،شامل ہیں۔

مظفرآباد(پی آئی ڈی)23 دسمبر 2021

چیف الیکشن کمشنر جسٹس (ر) عبدالرشید سلہریا نے جمعرات کے روز آزادکشمیر میں بلدیاتی الیکشن کے انعقاد کے حوالہ سے حلقہ بندیوں کے شیڈول کا اعلان کر دیا۔ اس موقع پر سینئر ممبر الیکشن کمیشن راجہ محمد فاروق نیاز، ممبر الیکشن کمیشن فرحت علی میر، سیکرٹری الیکشن کمیشن محمد غضنفر خان اور ڈائریکٹر جنرل تعلقات عامہ راجہ اظہر اقبال بھی موجود تھے۔ چیف الیکشن کمشنر نے آزاد جموں وکشمیر لوکل کونسل کی از سر نو حلقہ بندیوں کے لیے شیڈول کا اعلان کرتے ہوئے کہا کہ 23 دسمبر 2021 تا 05 جنوری 2022 تیاری ابتدائی مسودہ ازاں حلقہ بندی کمیٹی، 06 جنوری 2022 تا 09 جنوری 2022 اشاعت ابتدائی مسودہ حلقہ بندی ازاں حلقہ بندی کمیٹی، 07 جنوری 2022 تا 14 جنوری 2022 حلقہ بندی اتھارٹی کے پاس عذر داریاں کرنے کا دورانیہ، 08جنوری 2022 تا 20 جنوری 2022 حلقہ بندی اتھارٹی کی جانب سے موصولہ عذر داریوں کی سماعت و فیصلہ جات کا دورانیہ، 21 جنوری 2022 تا 24 جنوری 2022 حلقہ بندی کمیٹی کی جانب سے حتمی حلقہ بندی الیکشن کمیشن کو ارسال کرنا ہوں گی جبکہ بلدیاتی الیکشن کے انعقاد کے سلسلہ میں لوکل کونسل ہاء کی ازسر نو حلقہ بندی کے لیے ڈپٹی کمشنر کی سربراہی میں کمیٹی بھی قائم کر دی گئی ہے۔ کمیٹی میں ڈپٹی کمشنر چیئرمین حلقہ بندی کمیٹی ہوں گے جبکہ اسسٹنٹ کمشنر اور اسسٹنٹ الیکشن کمشنر، ڈسٹرکٹ الیکشن آفیسر ممبر ہوں گے۔ انہوں نے کہا کہ ڈپٹی کمشنر کو اختیارحاصل ہوگا کہ وہ اپنی ضرورت کے مطابق کسی بھی محکمہ سے آفیسر مامور کر سکتا ہے۔ چیف الیکشن کمشنر نے کہا کہ آزادکشمیر میں عدالت العظمیٰ کے حکم کے مطابق بلدیاتی انتخابات اگست سے قبل کروائے جائیں گے۔ انہوں نے کہا کہ جن لوگوں نے ابھی تک ووٹ کا اندراج نہیں کروایا وہ 20 فروری 2022تک اپنے ووٹ کا اندراج کروالیں۔ اس حوالے سے بھی ہدایات جار ی کر دی گئی ہیں۔